أبو خالد
06-10-2009, 01:02 PM
يمه لمن قعدت أتصل كتير ويقولوا لي أنك بخير بس الدكتور مانعك من الكلام خفت عليك شديد ... وقلت أجيك ... قعدت أرتب أمر الوليدات في البلد الصعبة الفيها الجار ما بيسأل على جارو .. بس عارفة يمه من سمعت بمرضك بقت ترجع لي صورة أخر يوم شفتك فيه وأنا راجع للغربة البطالة... متذكرة يمه كان الوقت بعد صلاة الفجر حضنتك شديد وكتير ... أكتر من أي مرة سافرت فيها وبكيت يمه وبكيتي ... وصلت الباب لقيت وليد موقف العربية سلمت على الناس وبعد ما ركبت قلت لوليد دقيقة ... رجعت ليك تاني لقيتك لسه بتبكي وتاني حضنتك شديد وقلت ليك يمه عشان خاطري أبقي قاعدة لمن أجي تاني ..داير أشوفك تاني ... قعدت في حضنك مسافة جرتني فاطمة أختي وقالت لي الإجازة الجاية تعال ونوم في حضنها زي ما داير ... عارفة يمه وفاطمة بتجرني من حضنك كنت حاسس أني ما حأشوفك تاني وحسيت في جرتها لي كأني بطلع من جواك وبطلع من جواي ... الأحساس ده جاني لمن سمعت بمرضك وكنت بسابق الأيام عشان أجي اشوفك ولمن أتحددت كل الحاجات ... سقت الأولاد ونزلت عشان أشتري ليك المسك البتحبيه وكان الوقت مع صلاة العشاء أتصل شوقي أخوي سألني سؤال غريب كيفك ... أنت سايق ولا شنو ... قلت ليه شوقي أمي ماتت مش ... قال لي أيوه ... حسيت بطعنة في جنبي وقفت العربية حاولت أتماسك قدام الأولاد اتكيت على الدرسكون .. أتخجيت من غير صوت لقيت سارة لافة يدها في رقبتي من وراء وبتبكي وتقول لي " أبوي عليك الله ما تبكي عليك الله ما تبكي " أستغفر الله العظيم يمه ما قادر اكمل ... يمه ياخ مشتاق شديد